ආදරය හා ප්‍රේමය

ආදරය ද මල් උයනකි 

මුලු ලෝකෙම සුවද කරන 

සතර දෙසින් එන ජනයා 

ඒ සුවඳින් මුසපත් වන

 

මල් සුවඳින් සුවද කවා 

වෙළදපලක විකිණී යන 

විලවුන් බඳුනකි ප්‍රේමය 

එක් මිනිසෙකු මත තැවරුණ

193 සතිය

ඕනෑම සංකල්පයක්  තම යහපතට යොදා   ගැනීමට අප දක්ෂ විය යුතුය. අඥානයාට ලැබුනු පිහිය ඔහුට මෙන්ම අන් අයට ද අනතුරක් කරයිග

මෙතෙක් මට අවනතව සිටි සිත

මගේ සිත දුවනවා

නුඹේ ලඟ රැඳෙනවා

නුඹම ගැන කියනවා
කියා මා පෙළනවා

මෙතෙක් මට අවනතව සිටි සිත

මගේ ලඟ මා තබා ගත්තද

ඉඩක් ලද විට දුවයි ඔබ වෙත

කිමද ඔබ කල අරුම කිව මැන

දහක් තරු දැක නොපිපි සියපත

හිරු සදිසි කල පිපී එන ලෙද

නොයෙක් කම් සැප ලදත් මේ සිත

ඔබ වෙතම ඉගිලෙනා අරුමය

 

192 සතිය

ජාත්‍යාන්ධන්ට දියමන්ති පෑමෙන් එහි වටිනාකම ඔවුන්ට නොතේරේ. ඌරන්ට රසමසවුලු දුන්නත් අසූචි තරම් නොවටී. එසේම කෙලෙස් වසඟයට පැමිණි පුද්ගලයා ධර්මයෙහි වටිනාකම තේරුම් නොගනී

191 සතිය

යමක් ලබාගැනීමට ඇති ආශාව යනු ඒ දේට ඇති ආශාව නොව තමන්ගේ හිතේ ඇති අඩුව නැති කිරීමට ඇති ආශාවයි. ඒ දේ ලැබුනු පසුව එම අඩුව නැති වන විට ඊට ඇති ආශාව ද පහව යයි.

අර්ථය ලබයි බණ නුවණින් බැලූවොත්

කලල් ගොඩක් මැද තිබිලා            ලැබූවත්
මැණිකේ අගය අඩු නොමවෙයි කෙසේවත්
කියනා කෙනා  නුහුගුණයෙන්       කියූවත්
අර්ථය ලබයි බණ නුවණින්      බැලූවොත්

ධර්මය කියා දෙන අය ගරහන්න             එපා
බුදුනට නිගා වන ලෙස හැසිරෙන්න        එපා
අනුවණ කමින් පව් සිදුකර ගන්න           එපා
පරලොව නොයන මෙන් ජීවත් වෙන්න එපා

ධර්මය රකින අය ධර්මෙන් රැක       ගන්නේ
ලැජ්ජා භය නිසයි ලෝකය         පවතින්නේ
නුවණින් සිතා මැන කටයුතු       කරගන්නේ
දෙලොවවට වැඩ සදන සේ දිවි ගෙවපන්නේ

මුහුණු පොතේ කවියක් ලියා

මුහුණු පොතේ කවියක් ලියා
හැගුමන් සිතේ පා කර යවා
මගෙ ජීවිතේ හැර යයි කියා
සිතුනේ නැතේ සිහිනෙන් පවා

කදුලැල් මතින් විදි වේදනා
දහසක් පැතුම් දෙහදේ දරා
ගොඩනැගූ ජිවිතේ
මොහොතින් නැසී වැලළී ගියා

මාගේ නමින් ගිණුමක් තනා
කවුදෝ අයෙක් රවටා ඔයා
ඔබ මගේ ජීවිතේ
සියතින් නසා මෙලොවින් ගියා

190 සතිය

රූප පෙන්වීමෙන් හෝ ශබ්ද ඇසීමෙන් හෝ සුවද ආඝ්‍රාහනයෙන් හෝ රසවත් දේ කෑමෙන් හෝ පහස ලැබීමෙන් හෝ සතුට නොලැබේ, එය කරනු ලබන්නේ සංඥාවෙනි.

මාගේ මරණය සිදු උනා

මා දමා ඈ ඉගිල ගිය දා
                මාගේ හදවත නැවතුනා

මාව අපලේඛණය කල දා
                මාගේ මරණය සිදු උනා

 සොයා මා ඈ  ආව දිනකදි 
                මාගේ හද යලි ගැහේ වී

ඇගේ සිනහව දුටුව දිනකදි
                   යලිත් මා පණ ලබාවී

189 සතිය

අප ආදරය කල යුත්තේ රන් කූඩුවක දමා ආරක්ෂා කිරීමෙන් නොව නිදහසේ පියඹා යන විට ආරක්ෂාව සැලසීමෙනි.

නුඹ හිනැහේ නම් - මා සැනසෙන්නම්

සඳට එහා හිරුට එහා 

මට නොපෙනෙන ඈත රටක 

නුඹ හිනැහේ නම් - මා සැනසෙන්නම්

 

නීල පළිඟු මුතු අතුරා 

ඒ මත යහනක් කරවා 

පුළුන් වලා සේද මතින් 

නුඹ සැතපේ නම් 

පන් පැදුරක සීත රැයක 

මා සැනසෙන්නම්

 

බෝ සත් ගුණ සිත පුරවා 

නුඹ අසලින් හිඳින නුරා 

සඳ කිඳුරකු ඔබ සනහා 

සෙවන සදයි නම් 

මං තනිකඩ කුරුළු රජකු 

සේ සැනසෙන්නම්

 

 

188 සතිය

අපට ගඟක් හැරවීමට උවමනා නම් කල  යුත්තේ ඒ දෙසට පල්ලම සකස් කිරීම යි.

187 සතිය

අනිවාර්යයෙන්ම අම්මා මැරෙයි, තාත්තා මැරෙයි, පෙම්වතා පෙම්වතිය මැරෙයි. ඊට පස්සෙ ජීවිතේට මුහුණ දෙන්න අපි සූදානම් ද? නැත්නම් ඒ ප්‍රශ්න දැන්ම හිතන්න ඕනේ නැද්ද?
එහෙනම් ඇයි රස්සාවක් ලැබෙයිද?, ස්ථිර වෙයිද?, ඇත්ත කිව්වොත් තරහවෙයිද?, එයා බෑයි කියයිද? වගේ අනියත ප්‍රශ්න ගැන හිත හිත බය වෙන්නේ, ආතතියට පත් වෙන්නේ ?

පරවී යන මල හිමිකම් නෑ

පර සතු උයනේ පිපුනු මලේ

පැහැය විඳින්නට තහනම් නෑ 

සුවඳ විඳින්නට තහනම් නෑ 

ඈත ඉඳන් එන සමනලුනේ

 

මල් අයිතිය මල් කරුවාටයි 

නෙලා ගන්න අයිතිය ඔහුටයි 

එනමුත් ඒ මල වට ඉගිලෙන්නට 

තහනම් නෑ

 

මෙහා ඉමේ මා තනිවී ඉන්නෙමි 

මලේ සුවඳ හා රුව විඳ ගන්නෙමි 

නෙලුවත් මා ඒ පරවී යන මල 

හිමිකම් නෑ

186 සතිය

පරාර්ථකාමයේ අඩිතාලම විය යුත්තේ අල්පේජ්ජතාවයයි.

185 සතිය

දැන් සතුටුවිය නොහැකි තැනැත්තාට කිසිදා නැවත සතුටු විය නොහැක.

184 සතිය

අප යම් ක්‍රියාවක් විනිශ්චය කල යුත්තේ ක්‍රියාව කරන්නා දෙස බලා නොව ක්‍රියාවේ ආදීනව දෙස බලාය.

අඩුවී නැත ආදර හිත ඈ කෙරේ

මලේ සුවඳ විඳ නැත්තෙමි 

මලේ පැහැය දැක නැත්තෙමි 

මලෙහි මෙලෙක ලැබ නැත්තෙමි 

එනමුත් මම ආදරේ

 

ලඟින් ලංව හිටියත් ඒ කාලයේ 

දුරින් ඈත හිටියත් මේ කාලයේ 

ආලවන්ත කම් නොකලත් මා කෙරේ 

අඩුවී නැත ආදර හිත ඈ කෙරේ

 

ලමැඳ හිස තබා හිඳ නැත මා ඇගේ 

දෑත දෑත බැඳ ගොස් නැත මා ඇගේ 

තුරුලේ හිඳ නැලවි නැතත් මා ඇගේ 

අඩුවී නැත ආදර හිත ඈ කෙරේ

 

183 සතිය

අපි අපේ අවසන් අරමුණ වෙතට ගමන් කලයුතුය. නමුත් අරමුණ වෙත ගමන් කරනා මාර්ගය අපේ අරමුණ නොකරගත යුතුය.

182 සතිය

කුළියට ගත් වස්තුවක් භාවිතා කරන්නේ යම් සේ ද එසේ සියල්ල පරිහරණය කල යුතුය.

මාගේ දයාබර කුරුල්ලනේ

ඈත ඉදන් දුර සීත රටින් එන මාගේ දයාබර කුරුල්ලනේ

 මාගේ සිතේ ඇති ආලවන්තකම ඈට කියාපන් කුරුල්ලනේ

 

නීල නුවන් ඇති ඈගේ බැලුම් හෙලන ලෙසින් නුඹ මදෙස ඇයි බලන්නේ

 ඈ ද කියන් ඒ කෝල බැලුම් හෙලන යුරුන් නුඹලාට කියා දුන්නේ

 

හීන හඬින් ඇය කෝල කතා මට දොඩන ලෙසින් කිමද ගී ගයන්නේ

 ඈ ද කියන් ඒ මිහිරි හඬින් ගී ගයන යුරුන් නුඹලාට කියා දුන්නේ

181 සතිය

අපට නොලැබුන දෙයහි අයහපත ද ලැබෙන්නට තිබෙන දෙයහි යහපත ද දැකීමෙන් පශ්චාත්තාප වීමෙන් වැලැකිය හැකිය.

180 සතිය

අපව අමතක කර දමන මිතුරන්ට වඩා අපට වෛර කරන අයට ස්තුතී වන්ත වෙමු. මන්ද ඔවන් අපව අමතක නොකරනු ඇත.

සල්ලි හොයනවා තක දොං සල්ලි හොයනවා

ඇති හැටියට හිටි කාලේ - අට පැය වැඩ කල කාලේ

නිමාවෙලා මුළු දවසම සල්ලි හොයනවා

ආර්ථිකේ ගොඩ ගන්නට - මගේ පවුල රැක ගන්නට

මුළු දවසම වෙහෙස වෙලා සල්ලි හොයනවා

මට නිදහසෙ ඉන්න කියා වැඩපල අඩුවෙන්න කියා

ගෙනා බිරිඳ සනසන්නට සල්ලි හොයනවා

ළමයින් රැක ගන්නට මා සල්ලි හොයනවා

පයින් යන්න බැරිය කියා වාහනයක් ගත්තු නියා

වාහනයට තෙල් ගහන්න සල්ලි හොයනවා

ලීසිං එක ගෙවාගන්න සල්ලි හොයනවා

ගේ පොඩ්ඩක් හදාගන්න බැංකු ගියේ ණයක් ගන්න

ණය වාරික ගෙවා ගන්න සල්ලි හොයනවා

ගේ වැඩ අහවර කරන්න සල්ලි හොයනවා

179 සතිය

තමාට කැමැත්තෙන් තරහා ගෙන්නා ගැනීමට නොහැකි සේම අන් අයටත් තරහ කැමැත්තෙන් ගෙන්වා ගත නොහැක. ඒ නිසා යමෙකු තරහින් ඔබට ක්‍රියාවන් කරයි නම් ඔවුන්ට අනුකම්පා කල යුතුය.

178 සතිය

අප යම් ක්‍රියාවක් විනිශ්චය කල යුත්තේ ක්‍රියාව කරන්නා දෙස බලා නොව ක්‍රියාවේ ආදීනව දෙස බලාය.එබැවින්, ප්‍රතික්ෂේප කල යුත්තේ පුද්ගලයා නොව ක්‍රියාවයි